Oñitram

CONTO DO SAMAÍN

2011-11-14T12:36:00.000+01:00

Chegou a noite do Samaín. Eu xa a estivera esperando meses e meses, na miña cova. E quen son eu? Pois un lobo negro, como o carbón, cos ollos amárelos coma as estrelas e moita sede de sangue.

Esa noite estaba listo para saír na procura dunha presa humana, a miña comida favorita. Os meus afiados cairos necesitaban despezar carne.

Deixei a miña cova na escuridade da noite, para pasar desapercibido.

A noite do Samaín era a favorita dos lobos, porque é cando a xente tennos mais medo. Nas súas crenzas dise que na noite do Samaín, os lobos saen de caza posuídos polo mal e comezan a matar á xente como se nada.

Por fin, despois de camiñar durante un quilómetro ou dous, divisei a aldea. Que ben!

Senteime a decidir en que casa entraría a comer. Ao final decidinme por una pequena granxa, que estaba moi preto de min. Cando cheguei ata ela decateime que cometera un erro elixindo una granxa. Tiñan un can pastor que se puxo a ladrar e ouvear coma un tolo. Ben, non me quedaba mais remedio que desfacerme del. Cun salto e una chanchada, quedou tirado no chan. Cando rematei metinme dentro da casa. Por sorte ninguén se decatara dos ouveos do can.

Dentro, todo estaba en silencio. Nunha habitación estaba o granxeiro. Noutra a súa muller e os seus fillos. Decidinme polo home porque cos outros tería moi pouca carne. Entrei na súa habitación e olleino. Estaba gordo, xenial! Subinme na súa cama, sen que ninguén puidera facer nada, papeino case enteiro e, para rematar, collín a súa cabeza como trofeo e voltei cara o bosque.

De súpeto, atopeime a media aldea vagando por alí con escopetas de caza. Cando me viron correron detrás de min intentando dispararme e ferirme. Non parei ata chegar a miña cova. Unha vez alí celebrei a miña vitoria cun profundo ouveo que atravesou o bosque…

ELIA 6º EP

2011-07-06T00:47:00.001+02:00

VISITA Á ILLA DE AROUSA COS AMIG@S DA ARMENTEIRA

2011-06-01T14:09:00.003+02:00

LETRAS GALEGAS: LOIS PEREIRO

2011-06-01T14:01:00.004+02:00

CORRELINGUA 2011

2011-05-21T23:31:00.003+02:00

LETRAS GALEGAS 2011

Lois Pereiro, autor homenaxeado este ano, foi o personaxe ao que lle adicamos no centro a nosa a tención e estudo.

O pasado 17 de maio, realizamos unha activiadade innovadora, organizada polo EDLG do centro e que consistiu nunha lectura colectiva dun dos poemas do autor, que foi acompañada pola proxección de imaxes alusivas ao texto.

2011-03-22T20:26:00.004+01:00

ROTEIRO CASTELAO

Hoxe o alumnado de 3º ciclo de Primaria participou no Roteiro Castelao, organizado e promocionado polo Concello de Pontevedra.
Tivemos a oportunidade de visitar rúas e lugares de Pontevedra vencellados historicamente coa figura de Castelao, así como unha Sala do Museo Provincial, na cal se conservan parte da obra e pertenzas deste importante personaxe.
Máis tarde, cando rematou este roteiro guiado e aproveitando a saída visitamos a Basílica de Santa María, a rúa da Amargura, na cal se ubicou o antigo Tribunal da Inquisición, os restos da antiga Muralla, a rúa dos xudeos...

Resultou unha saída moi entretida e proveitosa.

Xogamos: O trivial das mentiras históricas

2011-01-24T20:51:00.010+01:00

Seguro que escoitastes algunha vez que Napoleón era moi baixiño, ou que os piratas enterraban os seus tesouros. Nada máis lonxe da realidade, Napoleón media case 1,70 m., unha estatura máis que aceptable para a súa época; e nunca se atopou un tesouro pirata enterrado, o normal era que gastasen os seus botíns en tabernas e casas de xogo.

Os alumnos e alumnas do 3º ciclo de Educación Primaria fixeron un traballo de investigación sobre algunhas destas "mentiras históricas", feitos que a maioría das persoas pensamos que son reais, pero que en realidade non son máis que mitos ou lendas urbanas.

Agora, propoñémosvos que xoguedes a descubrir as "mentiras históricas" facendo clic nas seguintes ligazóns:

Xogo para dous xogadores.

Xogo para un xogador.

2010-12-22T20:56:00.024+01:00

INTERCAMBIANDO FELICITACIÓNS COA ARMENTEIRA

Nestas datas de Nadal os alumnos de 2º, 4º e 6º de Primaria quixeron felicitarlles as festas aos seus amigos do CEIP Armenteira dun xeito diferente.

En cada curso prepararon unhas cartas moi especiais que lles mandaron cuns formatos navideños que queremos que vexades.

Pinchade en cada un dos debuxos para poder velas.

---Alumnos de 2º------------Alumnos de 4º-------------Alumnos de 6º

SAMAÍN 2010

2010-11-05T12:22:00.007+01:00

A palabra Samaín significa fin do verán, principio do inverno.

Na noite do 31 de outubro ao 1 de novembro, os antigos moradores dos castros reuníanse no camposanto. Era a noite máis perigosa do ano: as portas do outro mundo ábrense e as ánimas defuntas volven ao noso mundo para render contas inacabadas.

Para afastar dos seus castros ás perigosas ánimas adoitaban colocar en lugares ven visibles as caveiras iluminadas dos inimigos mortos en campaña.

De aquí, dos ritos e crenzas célticas ao redor da caveira, ven a nosa tradición de facer caliveras na cortiza dos melóns, cabazos, calacús, calabazotes, colondros...

No CEIP San Martiño non queremos que se perda esta antiga tradición e cada ano celebramos o Samaín con diferentes actividades: lectura e representación dun conto, valeirado e tallado de cabazas... Aquí tedes unha mostra fotográfica do noso Samaín.

DIA INTERNACIONAL DAS BIBLIOTECAS ESCOLARES

2010-10-27T23:22:00.006+02:00

Co gallo da celebracion do Día Internacional das Bibliotecas Escolares (24 de outubro), na clase de plástica, as nenas e nenos de 2º curso fixemos estes marcapáxinas con rotuladores de cores, empregando a técnica dos puntiños ou das raias.

Pasámolo moi ben facéndoos!!!

Logo empregarémolos para sinalar nos libros onde imos lendo.

Os orixinais pódense ver na porta da nosa clase, pero a nosa mestra sacoulles unhas fotos para que os puidésedes ollar dende a casa.

Esperamos que vos gusten.

Marcapáxinas 2º

View more webinars from marisabello.

2010-10-22T13:24:00.005+02:00

OBRADOIRO FOTOPERIODISTA

No CEIP San Martiño empezamos o curso con visitas didácticas, o que é a nosa metodoloxía habitual de traballo do profesorado e que nos serve de motivación e de aprendizaxe.
O martes 19 de outubro o alumnado de 5º e 6º fomos a un obradoiro de foto periodismo a Caixa Galicia .
Primeiro vimos un vídeo no que aparecía un foto periodista sacando fotos a unha casa incendiada, iso quere dicir, que os foto periodistas corren moitos riscos cando sacan a foto porque teñen que estar moi cerca do suceso.
Aprendemos que a profesión de foto periodista naceu na guerra. Un dos foto periodistas máis importantes do século XX foi Robet Capa que dicía: “Se as túas fotografías non son o suficiente boas é porque non están o suficientemente cerca”. É difícil e perigoso ser foto periodista porque hai que sacar as fotos dende moi cerca e no momento xusto.
Despois pasamos a ver a exposición de fotos ao primeiro andar onde nos explicaron que hai varios tipos de fotografías:
-A que fai o foto periodista: na que se ven imaxes do que pasou realmente.
-Foto ilustración: que complementa a explicación dun texto.
-Fotografía artística: na que se da a sensación de movemento ou o que queira o fotógrafo
-Fotografía de crítica social: que nos mostra imaxes tristes ou pobres onde vemos que non todas as persoas teñen suficientes cousas para vivir.
Todos estes tipos de fotos vímolas na exposición e nolas amosou unha monitora chamada Ana que tamén nos ensinou un periódico moi antigo, todos pensamos que era moi aburrido porque non tiña fotos. Ela díxonos que as fotografías poden expresar moitas cousas.
Había fotos da folga do metal de Vigo, unha das que máis nos gustou foi a da torre de Hércules con raios no ceo que foi sacada no momento preciso.
Por último fixemos un taller de foto periodistas intrépidos que consistía en poñernos en grupos e facer o noso propio xornal ao que lle engadimos unha foto que nos sacou a nosa monitora Ana.
Foi unha saída moi interesante e divertida.

Alumnado de 5ºcurso.

Xa chega o Samaín!

2010-10-17T19:35:00.004+02:00

Dende o blog da biblioteca do CEIP Víctor Sáenz de Mazaricos chegan esta morea de recursos para celebrar o Samaín.

Hai de todo: cancións, videos, xogos, libros...Vai ser un Samaín... de medo!

Pincha na imaxe ou aquí e poderás coñecelos. Graciñas e ánimos dende Salcedoteca.

TABALLOS DE EXPRESIÓN ORAL FEITOS POLO ALUMNADO DE 6º APOIANDOSE NAS NOVAS TECNOLOXÍAS

2010-07-02T13:00:00.006+02:00

O alumnado de 6º ao longo do curso fixeron varias exposicións ao resto da clase sobre un tema que eles elexían para traballar a expresión oral como por exemplo: o lobo, os tigres, béisbol e, moitos máis que resultaron moi interesantes. Podedes ver esta mostra.

2010-06-28T13:24:00.003+02:00

HISTORIA DA LINGUA GALEGA

Agora que xa comenzamos as vacacións é interesante ir á praia e disfrutar, pero tamén... Podemos refrescar a memoria con este interesante libro de Pepe Carreiro sobre a historia da lingua galega. Mergullade no pasado e presente da nosa fala.

Open publication - Free publishing - More lingua

AGORA TOCOUNOS A NÓS IR Á ARMENTEIRA

2010-06-18T12:06:00.002+02:00

O día 14 de xuño o alumnado dos cursos de 1º, 3ºe 5ºde Primaria do CEIP San Martiño, visitamos o colexio da Armenteira, con motivo do intercambio cultural que estamos tendo estes dous Centros de medios naturais tan diferentes: rural a Armenteira e urbano San Martiño.
Cando chegamos, os da Armenteira esperáronnos agachados para darnos unha sorpresa e recibíronnos moi ben.
Moi pronto marchamos a facer a Ruta da Pedra e da Auga, foi unha longa camiñada pola beira dun río con moitas rochas que, a veces, facían pequenas fervenzas, estaba rodeado de moita vexetación, tamén había moitos muíños. As profesoras da Armenteira facían de guías e axudábannos a pasar polos lugares máis difíciles. Algúns de quinto tamén lle axudamos aos de primeiro. Cansámonos un pouco pero mereceu a pena, ao remate da ruta, está a Aldea Labrega, que ten varias estatuas de pedra, foi onde merendamos. Un pouco máis adiante, había un parque con bambáns onde xogamos e rimos moito. Alí as mestras da Armenteira repartiron “chocolatinas” e zumes para todos. Que ricas que estaban! Logo o autobús levounos de volta a Armenteira para ver o colexio por dentro, que é moi bonito e teñen as paredes cubertas duns murais preciosos, por último xogamos un pouco no patio e xa nos foi hora de volver para o noso colexio en Salcedo.
Foi unha experiencia xenial.
Mirade as fotos que fixemos.

2010-05-22T20:16:00.005+02:00

INTERCAMBIO CO CEIP DA ARMENTEIRA

O venres, 21 recibimos no centro aos alumn@s e profesoras do CEIP Armenteira co motivo do Programa de Intercambio cultural que se leva organizando dende o curso pasado por parte dos Equipos de Normalización e Dinamización Lingüística dos dous centros.

Para tal evento preparamos un programa de actividades encamiñadas a que ambas comunidades educativas puidesen coñecerse mellor e compartir experiencias xuntas.

En primeiro lugar, o noso alumnado quixo ofrecerlles un recibimento especial, presentando un pequeno número de maxia, co que aprenderan estes día pasados nos Obradoiros. A continuación disfrutaron de xogos para a convivencia no patio do centro e máis tarde presenciaron todos xuntos a actuación do Mago da Boina e Granpedrini que pecharon a semana dos "Obradoiros de Maxia", que se organizaran no centro.

Finalmente e como despedida, houbo unha pequena "grande merendola" de fraternidade entre os dous centros.

Para dar remate a este intercambio, o CEIP San Martiño ten pensado visitar ao CEIP Armenteira o próximo 11 de xuño.

Aquí quedan estas imaxes para o recordo de tod@s.

2010-05-15T00:20:00.006+02:00

LETRAS GALEGAS, 2010

O Courel, terra natal de Uxío Novoneyra, foi este ano o escenario elexido polo CEIP San Martiño para amosar as nosas manisfestacións artísticas, os nosos traballos escolares, realizados para render homenaxe ao "ilustre" ao que este ano se lle adica este día especial para todos os galegos de pro.

Aquí deixamos estas imaxes do acto que celebramos esta mañá, facendo un pequeno recitado de poemas e o relato dunha adaptación dun dos seu contos, que fixeron os compañeiros co CEIP Frian de Teis, aos cales lles damos as grazas por compartir coas demais Bibliotecas os seus materiais.

2010-05-14T13:39:00.003+02:00

CORRELINGUA 2010

Hoxe, 11 de maio, encolaboración con diferentres entidades que traballan en prol da lingua galega como son a Asociación Socio-Pedagóxica galega, a Confederación Intersindical Galega – Ensino, a Mesa pola Normalización Lingüística, o concello de Pontevedra, e outros, celebramos o Correlingua 2010, marcha pola cidade de Pontevedra que remata cun manifesto conxunto de todos os participantes en apoio da nosa lingua.

2010-05-07T12:03:00.015+02:00

LETRAS GALEGAS 2010, ANO DE UXÍO NOVONEYRA

Este ano imos celebrar o 2010 facendo unha parada especial na figura sobranceira de Uxío Novoneyra . Contan os que o coñeceron que tiña moita luz co seu pelo branco cheo de sabedoría amable. Era un gran "dicidor de poesía". Din que nos seus recitais as pombas voaban libres polo aire e a vida resultaba menos pobre, máis xusta.

Desde o CEIP San Martiño queremos dar as grazas a todos e todas os que, como Uxío Novoneyra, converten coas súa palabra a nosa lingua en arte.

VISITA DO ALUMNADO DE 6º AO XI SALÓN DO LIBRO

2010-03-02T12:45:00.009+01:00

O pasado martes 23 de febreiro tocounos aos de 6º visitar o Salón do libro de Pontevedra, que desta vez trata da cidade. Nós, como xa somos maiores, non fomos aos contacontos, tocounos ir a un obradoiro de regueifas e de rap: Cun rapeiro aprendemos a rapear un pouco, díxonos que o rap non é só música senón unha cultura, que empezou nos Estados Unidos en grupos afroamericanos que contaban os seus problemas utilizando esta música. O rap é un tipo de canto e baile con moito rimo. O rapeiro fíxonos unha demostración de como se facía, utilizou un casete cun rimo de batería moi forte ,díxonos que había que encontrar o pulso para cantar, e fixemos e cantamos este rap:

Non me gusta o cole
porque hai moitos deberes,
eu quero que mole
con moi bos profesores.

Despois un regueifeiro chamado Luís dos Carunchos explicounos moi ben o que son as regueifas: a súa historia, como ten que ser a rima , os versos ...pero se aprendes esta cantinela xa che sae soa .

TARA RIRO RIRO RIRO
TARA RIRO RIRO RARO

E entre todos fixemos varias regueifas, a última di así:

Vimos ao Salón do libro
e pasámolo moi ben
que pena que xa marchemos
deica logo e parabéns.
Deica logo e parabéns
pero pronto votaremos,
será o ano que ven
no instituto xa estaremos.

Cando saiamos entrevistounos a TVE de Galicia e entre todos cantámoslle a regueifa que fixeramos.
Por ultimo, pasamos a ver as exposicións dos libros e dos decorados paramos nunha sala que parecía un sumidoiro, alí, o noso compañeiro Brais contounos un pouco dun conto que xa contara outro día para pequenos.Logo vimos a exposición do escritor Agustín Fernández Paz.
Pasámolo xenial.

2010-02-22T23:12:00.005+01:00

ORGULLOSOS DO NOSO, ORGULLOSOS DO GALEGO

A Coordinadora Galega de ENDL (Equipos de Normalización e Dinamización Lingüística) está formada por equipos de centros públicos, privados e concertados, e deles formamos parte profesionais do ensino que levamos anos traballando a prol do galego; persoas de ideoloxías moi plurais, unidas por un mesmo ideario lingüístico: o galego é a lingua propia de Galicia, tal e como di o Estatuto de autonomía.
Actualmente está a levar adiante unha campaña de respecto e sensibilización hacia a lingua galega e nela participan personaxes públicos coñecidos como Martín Rivas, Belén Regueira, Antón Reixa, Susana Seivane, Luís Tosar e María Castro...
Podemos ver parte desta campaña no seguinte vídeo:

2010-02-19T14:38:00.004+01:00

ENTROIDO GASTRONÓMICO

Este venres, 19 celebramos a festa gastronómica do Entroido 2010.

Non faltou de nada: orellas, filloas, chulas, pasteis variados...

Os disfraces, os xogos, as risas, a comida tan rica! ... todo fixo que disfrutasemos de momentos moi bonitos.

Queremos agradecer dende aquí o interese e a amabilidade que tiveron todas as familias, que coa súa colaboración conseguiron que este día fose un éxito.

Ao rematar a festa, todos os doces que sobraron enviámolos ao Comedor dos Pobres (San Francisco) para que os máis necesitados puidesen tamén difrutar do entroido.

Unha vez máis grazas a tod@s pola vosa cooperación e xenerosidade!

E aquí deixamos, coma sempre a reportaxe gráfica para o voso recordo:

2010-01-12T17:20:00.011+01:00

GALICIA ENCANTADA

Galicia Encantada é unha web que recopila a fantasía popular de Galicia e recorre "a historia da Galicia imaxinaria, mitos, lendas, ritos, contos, romances e aventuras que se resisten ó esquecemento e que siguen vivindo na nosa memoria colectiva.

Podemos entrar neste mundo encantado de fantasía para coñeder máis da nosas tradicións populares e incluso podemos tamén participar remitindo á mesma aquelas historias, contos, lendas... que coñecemos de sempre e que queremos compartir cos demais.
Anímate a entrar, pincha nesta imaxe:

BO NADAL AOS NOS@S AMIG@S DE ARMENTEIRA

2009-12-21T13:14:00.003+01:00

Os nenos e nenas de 1º, 3º e 5º do Colexio de San Martiño, deséxanvos a todos os do cole de Armenteira unhas Felices Festas de Nadal e un boísimo 2010, no que esperamos estar con vós.

¡Bo Nadal e bicos dende San Martiño!

FELIZ NADAL

2009-12-21T13:00:00.013+01:00

O ENDL do CEIP San Martiño súmase á coordinadora dos ENDL de Galicia para felicitar o Nadal a tod@s con esta tarxeta:

"Todos/as sabemos que os soños non se alcanzan sen esforzo, por iso no ano 2010 que comeza contamos contigo para seguirmos traballando a prol da lingua. "

Preme na imaxe para ver a tarxeta en movemento coa mensaxe completa.

EXPOSICIÓN LITERATURA POPULAR DO MAGOSTO

2009-12-11T12:23:00.003+01:00

A semana pasada e co motivo da chegada do Nadal, retiramos unha exposición sobre a literatura popular do Magosto, que os nosos alumnos e alumnas recolleron este ano, facendo unha pequena investigación no entorno das súas familias.

Dada a importancia deste material recollido e querendo agradecer a grandes e pequenos que participaron nesta actividade, decidimos deixar en Oñitram un pequeno recordo do mesmo.

EDUCAMERCADO

2009-12-01T17:06:00.006+01:00

EDUCAMERCADO é unha actividade organizada pola FANPA (Federación de Asociacións de Nais e Pais de Alumnos, no que quixemos participar este curso dado o seu valor formativo, enfocado hacia a educación para o consumo e os hábitos saudables.

Os nosos alumnos visitaron o Mercado de Abastos de Pontevedra e ademais de coñecer as instalacións e os diferentes productos que se venden alí, tiveron a oportunidade de realizar unha compra responsable despois de elaborar unha lista na clase maxistral que recibiron no mercado sobre consumo saudable.

MAGOSTO

2009-11-13T14:12:00.011+01:00

O día non quería, pero alá fomos nós co magosto adiante!!

Ao final a chuvia colleulle medo a desilusionar a tanto rapaz e rapaza e pasámolo de marabilla!!

Este ano organizáronse xogos en distintas zonas do patio polas que foron pasando todos os cursos. Os encargados de organizalos foron os nenos e nenas de 6º de Primaria. Tivemos carreiras de sacos, o Xogo da ra, o Arrincacebolas, a Petanca, o Encestacastañas, os Zancos, carreiras levando castañas nunha culler...

A grande novidade foi o xogo do trompo, porque xa sabedes, "Polo San Martiño, trompos ao camiño": a partir de 3º de Primaria aprenderon a bailar o trompo moitos nenos e nenas e tamén houbo profesores que se apuntaron a intentalo...

Damos as grazas aos avós, pais e nais que se achegaron ao patio para colaborar no xogo do trompo e tamén por compartir cos nenos e nenas uns momentos de diversión.

Aquí quedan estas fotos para que recordedes esta grande castañada.

O SAMAÍN

2009-10-30T14:23:00.004+01:00

Este curso non podía ser doutra maneira: a pesar das obras,. de ter a Biblioteca pechada e doutros atrancos... celebramos por todo o alto a festa do Samaín.
Fixemos unha exposición de cabazas: cabazas tradicionais, cabazas modernas, cabazas faladoras, rokeras, noivas, piratas... e todo o que deu de si a imaxinación.
Tampouco faltou o conto, escenificado polos "profeactores", que non sabemos a razón, pero deron máis risa ca medo... e non porque o fixesen mal, senón porque o conto deste ano: "A figueira de Pelostortos" da Editorial OQO causounos moita risa a todos.
Tamén contamos coa actuación dos alumnos de 3º de Primaria, que nos leron unha poesía de medo, titulada "Noite de defuntos" feita por eles mesmos. Parabéns dende aquí á súa capacidade creativa. Aquí o podedes ler:

Noite de defuntos

Era unha noite escura,
fría, baleira, terrorífica...
zoaba o vento,
escoitábanse os tronos.
A bruxa piruxa
remexía a súa pota
e dicía o seu conxuro:
"Ás de morcego,
tea de araña
bigote de rato,
sangue de sapo."
Ao seu lado o zombi Marcelo
de pel verde,
ollos amarelos,
boca desdentada,
roupa esnaquizada,
pelexa co gato Ernesto.
Ábrese a porta,
chega o esquelete,
a pantasma e a momia.
Traen para a cea
ósos de can,
tripas de lagarto,
ollos de peixe,
pastel de vermes.
Séntanse á mesa,
comen sen cubertos.
Que lles aproveite!!!

PROXECTO DE INNOVACIÓN EN NORMALIZACIÓN LINGÜÍSTICA

2009-10-14T13:04:00.010+02:00

A Secretaría Xeral de Política Lingüística e a Dirección Xeral de Educación, Formación Profesional e Innovación Educativa convocan, cada ano, uns premios que pretenden fomentar o desenvolvemento de proxectos educativos innovadores que impliquen o uso da lingua galega.

Este ano, o CEIP San Martiño, vai participar na convocatoria destes premios co proxecto “Facendo CLIC en galego”.

Os contidos a traballar xiran arredor do tema das CIDADES. Este proxecto estenderase dende outubro ata finais de febreiro. Neste tempo trataremos de que as actividades deseñadas contribúan á utilización do galego dentro e fóra das aulas e, ao mesmo tempo, que axuden á adquisición da competencia dixital do noso alumnado.

Para alcanzar estes fins estamos a elaborar uns materiais multimedia en galego, de uso na aula, como un recurso máis entre os materiais curriculares a empregar no noso labor docente.

SEGUIREMOS INFORMANDO...

NOVAS TECNOLOXÍAS EN GALEGO!

2009-10-07T21:14:00.013+02:00

Agora que vivimos momentos duros para a normalización da lingua, nos que a permanencia do galego nas vindeiras xeracións aínda está por ver, acabamos de enterarnos dunha noticia que nos parece moi significativa e alentadora para o futuro lingüístico no noso país: a próxima publicación por Xerais do primeiro libro electrónico en galego!

Pasámosvos o enlace, por se o queredes ollar:

http://www.vieiros.com/nova/76635/xerais-lanza-no-seu-30-aniversario-os-primeiros-ebooks-galegos

O BEN FALADO

2009-09-29T19:49:00.006+02:00

Nesta carta escrita por unha emigrante retornada, vese en esencia a importancia do que é para cada persoa a súa lingua, do que é para os galegos, a lingua galega, xa que, como ela ben di, "NA LINGUA ESTÁ A MANEIRA DE SER E DE SENTIR DE CADA UN DE NÓS".

Desta maneira, queremos comezar este curso a nosa andaina pola normalización do galego, pola normalización da nosa lingua.

Que o pasedes ben vendo este vídeo e que nos sirva a todos para a reflexión...

Benvidos tod@s a un novo curso!!!!

INTERCAMBIO COA ARMENTEIRA

2009-06-16T13:02:00.001+02:00

O día 29 de maio fomos visitar aos nosos amigos do colexio da Armenteira. Ese día estabamos bastante nerviosos porque iamos de invitados a un colexio que non era o noso. O camiño non é moi longo, mais xa estabamos impacientes por chegar. En canto avistamos o val onde está o colexio pareceunos unha paisaxe marabillosa.
Nada máis chegar, recibíronnos calorosamente con abrazos, bicos e saúdos, aínda que ao principio nos gastaron unha broma escondéndose todos no ximnasio. O primeiro foi amosarnos o seu colexio que o teñen moi ben decorado, cuns preciosos murais de cores moi vistosas. Mentres iamos charlando animadamente polo camiño, fomos andando ata o Mosteiro da Armenteira. Ao chegar recibiunos unha monxa que nos mandou pasar á capela dos rezos, alí nos explicou a lenda de San Ero e máis cousas do mosteiro. Despois vimos o claustro e a igrexa co grande rosetón e para rematar a visita ao mosteiro, quitamos unha foto todos xuntos na grande arcada románica da porta.
Volvemos outra vez para ao colexio para ver unha presentación dos traballos que fixeran durante o curso. Agora xa, nos tiñan preparada unha rica merendola, que tomamos con moi bo apetito. E por último xogamos moito: ao fútbol, cos aros, ao futbolín... Falamos e rimos moito.
Gustounos esta actividade de intercambio na que aprendemos moitas cousas: escribímonos cartas, coñecemos monumentos e lugares ... pero o máis importante foi compartir e facer amigos dun lugar diferente, do precioso Val da Armenteira.
Moitas grazas aos Equipos de Normalización Lingüística dos colexios da Armenteira e San Martiño por organizar esta interesante actividade.

¡¡¡VIVA A LINGUA GALEGA !!!

Agora vede as bonitas fotos da visita.

AS LINGUAS SUMAN

2009-06-14T23:25:00.006+02:00

O ENDL de San Martiño quere informar a todas as familias do centro de aspectos importantes sobre o feito de que se eduque na escola en galego e en castelán, buscando sempre a competencia lingüística en ambas linguas ao remate da Primaria.

Ante a importancia que pode ter para o futuro da educación que reciban os nosos alumnos e alumnas, segundo as respostas que marquemos nas enquisas que hai uns días remitiu a Consellería ás familias a través do centro, aquí deixamos a seguinte información:

Open publication - Free publishing - More lingua

as

2009-06-14T23:24:00.000+02:00

LETRAS GALEGAS, 09

2009-05-19T17:16:00.004+02:00

Ramón Piñeiro dicía: "Deica entón -deica os seis anos- a miña lingua única fora a galega, así que o choque máis importante que me produciu a escola foi o cambio de lingua."

Este ano no CEIP San Martiño, rematamos a celebración da Semana das Letras Galegas cun espectáculo que deixou emocionados a alumnos e profesores: actuou para nós nada menos que MIRO MAGARIÑOS, actor galego de teatro e televisión que veu a presentarnos unha das súas obras tituladas "O vendedor de paxaros", que leva na súa posta en escea un teatro de sombras, que gustou moito ao público.

EXCURSIÓN FIN DE CURSO ÁS ILLAS CÍES

2009-05-15T11:14:00.019+02:00

O pasado 6 de maio,mércores, fixemos a nosa excursión de fin curso ás illas Cíes. Fomos en autobús ata o porto de Vigo, onde collemos o barco que nos levou a Cíes. Ir na cuberta do barco foi unha gozada difrutando das fantásticas vistas, mentras a brisa fresca nos rozaba as meixelas, tamén era imprisionante ver pasar outros barcos tan preto. Tivemos a sorte de ver a dous enormes cruceiros, que ese día visitaban Vigo.
En Cies era todo precioso: as praias, o faro, o seu pequeno lago e a súa vexetación.
Segundo chegamos, xa nos botamos protector solar, merendamos e logo seguimos a unha monitora que se chamaba Ana . Nos dixo que as illas Cíes son un espacio protexido e non se pode deixar ningún lixo, por iso, nos deron unha bolsa a cada un.
Guiados por Ana empezamos a subir cara ao faro, pasando primeiro pola Pena Campá e logo polo Mirador de Aves. Despois dunha ogotadora camiñata chegamos arriba, a algúns costoulles máis cá outros, pero subimos todos. As vistas dende alí eran bonitísimas, fixemos moitas fotos. A baixada foi fácil e rápida.
Comemos de picnic, xogamos e rimos moito.
A media tarde, lentamente voltamos ao barco; paseando e mollando os pés pola praia máis bonita do mundo e disfrutando dun bonito día soleado que sería moi difícil esquecer.

(Alumnado de 5º de Primaria)

2009-05-08T14:53:00.006+02:00

CORRELINGUA – 09

Este ano en Pontevedra tocounos empezar o Correlingua. Foi coma sempre, unha carreira polo Centro Histórico da cidade, na que participan todos os colexios da zona. Pero sobre todo tratase de ensinar aos nenos e nenas o importante que é o uso do idioma galego na nosa comunidade para que non se perda.
Durante o paseo pasámolo xenial, gastándonos bromas e cantando cancións. O noso colexio era o máis animado, todo o camiño iamos berrando !!! San Martiño!!! facendo ritmos !!!En Galego!!! Cando volvemos á praza da Ferrería déronnos auga , mazás e cacahuetes .Mentres merendabamos presenciamos a actuación do grupo ” Migallas “ que nos gustou moito Ao remate fixéronnos varios regalos: un lote de libros e un globo para cada colexio. O globo soltámolo todos ao mesmo tempo, uns 2500 nenos e nenas que estabamos alí . Cada globo era a ilusión de todos nós para que o galego siga voando por toda Galicia para sempre.

A VISITA DO CEIP ARMENTEIRA FOI XENIAL

2009-04-03T12:45:00.010+02:00

Despedimos o mes de marzo co encontro cos nosos amigos da Armenteira , a visita realizouse de acordo co programa que tiñamos previsto. Aí van un feixe de fotos e opinións:

Encontrámonos na praza da Ferrería, alí foi onde nos coñecemos, nada máis presentarnos, xa empezamos a falar, ó principio tiñamos algo de vergoña pero, despois xa collemos confianza e xa falabamos como amigos de toda a vida.

Recorremos o Centro Histórico da cidade. Fixemos o Roteiro Castelao e mentres camiñabamos nos fomos coñecendo, coma sempre, as nenas foron coas nenas e os nenos cos nenos. Un guía do Concello explicounos que a porta de Facenda era a porta da antiga muralla de Pontevedra. Na praza da Leña contounos que ata 1964 vendían leña. Entramos no Museo onde nos amosaron os cadros de Castelao. Seguimos pola Praza da Verdura , a do Teucro...

Logo xa viñemos xuntos no autobús para o noso cole que lles gustou moito; amosámoslles os libros que fixemos durante o curso e máis cousas . No comedor agardábanos unha sorpresa: os profesores tiñan preparada unha merendola, alí seguimos falando e saboreando a rica comida.

Despois saímos ao patio e estivemos xogando a diversos xogos: fútbol, escondite, pilla-pilla, baloncesto...

Cando tocou o timbre, subimos á biblioteca , onde os mestres contaron e proxectaron o conto de “Paco Papán” que nos gustou moito a todos.

O peor foi cando chegou a hora de despedirnos, porque non queriamos separarnos.

Pasámolo todos moi ben, os da Armenteira son moi divertidos.

!Foi unha gran experiencia!

INTERCAMBIO CON ARMENTEIRA

INTERCAMBIO CULTURAL CO CEIP DA ARMENTEIRA

2009-03-30T11:59:00.005+02:00

Os Equipos de Normalización Lingüística destes dous colexios están establecendo un intercambio cultural entre o alumnado de 2º e 6º curso destes Centros co fin de coñecer o ambiente de dúas zonas diferentes de Pontevedra unha rural e a outra urbana.
Xa mantiveron correspondencia colectiva polo Nadal e no Antroido. Agora chegou o momento de coñecerse , o martes 31 recibimos a visita dos nosos amigos da Armenteira.

Programa de actividades

I – Coñecer a nosa cidade
As 10 horas o alumnado de 2º e 6º coas súas profesoras reciben aos invitados da Armenteira na praza da Ferrería para a continuación recorrer e coñecer todos xuntos o Centro Histórico de Pontevedra, seguindo o roteiro Castelao ofertado polo Concello incluíndo un guía turístico

Itinerario

1. A Praza da Ferrería
2. Museo de Pontevedra
3. A Fábrica da Luz
4. Praza do Teucro
5. Praza das Cinco Rúas
6. Teatro Principal
7. Monumento a Castelao
8. O Instituto
9. Café Moderno
10.Rúa da Oliva
11. Café Méndez Núñez
S. Saída do roterio
F. Fin do roteiro

II – Sobre as 11,30 . Chegada de todos ao CEIP San Martiño. En primeiro lugar serán recibidos polo Director, Diego Fariña Villaverde, e a continuación realizarán diversas actividades conxuntas:
- Amosarlle o noso Colexío
- Animación na biblioteca
- Merenda e xogos

III – As 13,30 . Despedida e agasallos.

PLANETA ENDL

2009-03-25T14:37:00.008+01:00

O ENDL do CPI Aurelio M. Rei García de Cuntis lanza un Planeta de Equipos de Normalización e Dinamización Lingüística, chamado PLANETA ENDL.

O noso blogue de normalización, OÑITRAM, tamén forma parte desta nova web na cal podemos atopar ademais moitos outros blogues de interese e enlaces a diferentes sitios web relacionados co galego e a súa normalización.

Dende hoxe contamos cun enlace a Planetaki, para que poidades entrar cando desexedes e fagades consultas, comentarios... ou simplemente vexades as últimas noticias arredor do mundo do galego.

Premio "Abril, Mes dos Libros 2008"

2009-03-23T10:36:00.013+01:00

Inda non vos comunicaramos que fomos premiados no concurso "ABRIL, MES DOS LIBROS" do ano 2008, convocado pola Dirección Xeral de Creación e Difusión Cultural da Consellaría de Cultura da Xunta de Galicia. O premio consiste nunha dotación de 1000 euros para libros e material didáctico.

O CEIP San Martiño séntese moi honrado e agradecido por acadar este galardón que premia o traballo feito cos libros, sobre todo no mes de abril, mes tan importante para a literatura por celebrárense dúas datas moi importantes: o Día Mundial do Libro e o Día Internacional do Libro Infantil e Xuvenil. No CEIP San Martiño celebrámolo todos os anos coa nosa Semana da Lectura, que o ano pasado dedicouse aos "oficios tradicionais" e este ano, na súa quinta edición, ímola dedicar á pintura.

O curso pasado foi marabilloso para o noso colexio porque acadamos diversos premios de distintas institucións:

O MEC premiounos no concurso de “Buenas Prácticas para la Dinamización e Innovación de las Bibliotecas Escolares”, concurso a nivel de todo o estado español.

Da Xunta de Galicia recibimos dous premios; a Consellaría de Educación premiou o noso Proxecto Lector, e ultimamente a Consellaría de Cultura o mencionado “Abril, Mes dos Libros”. Estes premios tan importantes animan a todo o profesorado deste Centro para seguir traballando nesta mesma liña; unidos, en equipo, e participando nos proxectos que cada curso realizan con todo o alumnado e, que sen dúbida merecen os máis grandes parabéns.

Declaracións de amor

2009-02-26T19:22:00.021+01:00

Dentro do proxecto "Historias de amor", propuxemos aos alumnos de 5º e 6º de Primaria que escribiran unha declaración de amor, entendendo o concepto de amor nun sentido moi amplo, que incluiría o amor ás nais e pais, a unha parella, a un animal... ou incluso aos libros ou ao colexio.

Esta actividade tiña dous obxectivos fundamentais: dinamizar o uso da lingua galega e fomentar a utilización das novas tecnoloxías, dado que a canle empregada para enviar as declaracións foi o correo electrónico.

Premendo nos enlaces do primeiro parágrafo poderedes ler algunhas das declaracións. Animádevos, seguro que vos sentiredes identificados con algunha delas ou vos dan algunha idea namoradeira!

Entroido Indio

2009-02-24T22:38:00.005+01:00

A temática que abordamos este ano no entroido 2009 versou sobre a vida e a cultura dos indios americanos. Non só nos divertimos moitísimo, senón que ademais aprendemos unha chea de cousas acerca desta cultura milenaria tan interesante.

Ao longo da mañá o alumnado do centro, dividido en seis grupos, foron pasando cada media hora por diferentes "estacións":

- Composición dunha paisaxe india, na estación de plástica.
- Aprender como pintaban a cara, no obradoiro de maquillaxe.
- Elaboración do traxe indio, no taller de confección.
- Cancións e baile indios, na estación de música.
- Visionado dun documental sobre os indios, na Biblioteca.
- Tiro con arco, na estación de xogos ao aire libre.

No remate da mañá, todos os alumnos tiveron que someterse a unha proba de coñecementos e aptitudes para gañar o "Diploma Indio" e o "Carné de explorador apache".

A nosa satisfación foi saber que ningún alumn@ marchou sen o seu Diploma e sen o carné que os acreditaban como "auténticos apaches" e expertos coñecedores da cultura e dos costumes dos nativos americanos.

A continuación podedes ver un vídeo con imaxes das actividades realizadas, ou tamén fotos do entroido indio e da degustación gastronómica do venres, 27 de febreiro.

Entroido 09

CAMBIAREMOS A GUERRA POLA PAZ...

2009-02-04T18:03:00.017+01:00

Aínda que falar de PAZ nos tempos que corren nos resulte difícil, en San Martiño alumnos e profesores seguimos coa esperanza de que pequenos xestos e actos simbólicos, coma os que celebramos o día 30 de xaneiro, axúdannos a reflexionar e a prepararnos un pouco máis por dentro, para seguir nas nosas vidas o camiño da PAZ.

Este ano quixemos "cambiar a guerra pola PAZ..." e convertemos un campo de batalla, nun campo cheo de flores e de mariposas, dicindo moi alto e forte:

"Por cada bala, unha mariposa,

por cada bomba, unha flor.

Cambiemos o inverno pola primavera,

cambiemos a guerra, pola PAZ..."

A continuación cantamos cancións, lemos poemas... ata rematamos bailando.

Resultou un acto conxunto moi bonito, no que compartimos ilusións, esperanzas e no que, coma sempre, quixemos declararnos a favor da PAZ de forma incondicional.

Aquí achegamos estas imaxes para que poidades velo.

DÍA DA PAZ, 09

Intercambio co CEIP da Armenteira

2008-12-28T19:24:00.019+01:00

Este curso iniciouse un intercambio cultural co CEIP da Armenteira, centro rural e de contexto galegofalante, características que nos serven para potenciar no noso contorno escolar o emprego do galego. Programáronse diversas actividades que abordan diferentes aspectos, tales como o coñecemento do entorno histórico (visita ao Mosteiro de Armenteira, visita ao recinto histórico de Pontevedra...), convivencias en cada un dos colexios, intercambio de materiais didácticos e correspondencia convencional e por correo electrónico...

Neste tempo de Nadal, @s alumn@s de 2º e 6º de Primaria remitíronlles aos seus compañeir@s da Armenteira cadanseu libro cos mellores desexos para estas datas tan sinaladas. Se queredes ver como quedaron os libros so tedes que premer nos seguintes enlaces:

O noso Magosto

2008-11-24T10:02:00.015+01:00

O pasado venres, 14 de novembro celebramos o tradicional Magosto no centro, no que participamos todos. Coma sempre houbo unha boa castañada e tamén xogos populares para amenizar a celebración.

Os alumnos de 6º foron os encargados de facer o papel de monitores e coa axuda dos profesores, controlar que os xogos se desenvolvesen sen problemas.

O Magosto é unha das celebracións máis desexadas e esperadas polos nenos e resulta cada ano un evento que anima e potencia a convivencia no centro, ademais de divertirnos e axudarnos a dar a coñecer as festas populares galegas.

Achegamos unhas cantas imaxes para o recordo de tod@s.

Magosto

Xuntanza con Xulio Abonjo

2008-11-14T14:01:00.007+01:00

Xulio Abonjo

O día, 11 de novembro, día de San Martiño, bota os teus trompos aos camiños; festa aquí en Salcedo, que celebramos cunha visita moi interesante: O actor Xulio Abonjo irmán de Juan e Carlos Abonjo, alumnos deste centro.

Con el mantivemos un interesante encontro. O motivo da visita é que o alumnado de 5º e 6º foi ao Pazo da Cultura a ver a obra de teatro "Hendaya, mon amour", escrita e dirixida por Xulio Abonjo. Esta obra foi moi galardonada: Premio María Casares 2008, o premio á Mellor Maquillaxe; premio FETEGA no Festival Teatro do Carballiño á mellor montaxe e ao mellor actor...

Hendaya,mon amour é unha comedia romántica en clave de humor surrealista entre Franco e Hitler. O presenciar esta obra serviunos para que o alumnado de 5º e 6º estudara o perfil histórico destes dous ditadores que tanto influíron na nosa historia máis inmediata.

Xulio Abonjo é un actor pontevedrés aínda novo que xa ten unha dilatada carreira en diferentes medios. En teatro conta coa experiencia de traballar en varias compañias entre as que se contan Bacana e o Centro Dramático Galego. Tamén participou en moitas das series que se emitiron pola TVG; e no cine, en películas coma: O lapis do carpinteiro, entre outras.

Actualmente forma parte do elenco de "Cuestión de sexo", serie emitida por Cuatro. Ademais conta co premio ao mellor actor no festival de Cans pola curtametraxe "Sen chumbo".

Foi un verdadeiro pracer contar coa presenza e amabilidade de Xulio, que respondeu a todo un interrogatorio de preguntas, moitas sobre Hendaya, mon amour. Unha das preguntas foi se era unha obra para ver tamén os nenos e nenas, el contestounos que si, que moitos pais ían cos seus fillos e que lles gustaba.

En Pontevedra houbo algunhas protestas, pero iso é xente que coñece pouco o teatro e os gustos dos nenos da nosa idade. Nós dixémoslle que nos gustara moito e que xa era hora de que non visemos só obras de monicreques e que a entendiamos perfectamente e nos divertiu moito. Rematamos, regalándolle un libro que fixeron os de 6º sobre Xulio Abonjo e un conto viaxeiro feito no colexio: Os rabichos na fraga de Oñitram. E el asinounos un autógrafo a cada un.

Videos do Samaín

2008-11-03T19:00:00.007+01:00

Nota: se ves que o vídeo se para de seguido, segue estas instrucións: primeiro fai clic nel; a continuación párao no botón "pausa" e verás que na parte de abaixo aparece unha barra vermella que indica que o arquivo está cargando; por último, espera a que a barra chegue ata a metade e xa poderás ver o video enteiro dun tirón e sen paradas.

A Santa Compaña (alumn@s de 6º).

Lectura de Bola de Manteiga.

Celebramos o Samaín

2008-11-01T13:34:00.011+01:00

(Clic na imaxe para ver as fotos)

A celebración do Samaín encádrase dentro das actividades programadas polo ENDL para dar a coñecer as festas populares galegas. Os celtas crían que nesa noite a ventá que separaba o mundo dos vivos e o dos mortos desaparecía e que a véspera de Samain – que así clamaban a esa data- as almas dos mortos regresaban a visitar os seus fogares na terra. Para recordalo, hoxe en día colócanse cabazas ocas nas portas das casas, organízanse mascaradas, saen bruxas e vampiros ás rúas...

Ao longo da semana realizáronse no centro distintas actividades: documentais (busca de información), literarias (redacción de contos de medo) e plásticas (decoración de cabazas, debuxos, murais…) relacionadas con esta celebración.

Como colofón, o xoves, 30 de outubro, a biblioteca do centro converteuse nunha sala de exposicións, con preto dun centenar de cabazas decoradas polos rapaces e rapazas. Tod@s @s alumn@s do colexio foron visitando por grupos a exposición, mentres soaba unha terrorífica música de ambiente. Ademais, durante a visita fixéronse dúas lecturas: @s alumn@s de 6º de primaria leron aos seus compañeiros e compañeiras un traballo sobre a Santa Compaña e un grupo de mestr@s leron un conto de medo titulado “Bola de Manteiga”.

Análise sociolingüística do centro

2008-11-01T13:25:00.009+01:00

(Se queres ver as gráficas; clic na imaxe)

Durante o mes de setembro do presente curso escolar 2008-09 o Equipo de Normalización e Dinamización Lingüística (E.N.D.L.) elaborou unha análise sociolingüística do centro, mediante a realización de enquisas a todos os colectivos integrantes da comunidade educativa. A través deste estudo pretendíase saber cal é a situación lingüística do centro, do alumnado, do profesorado e do contorno.

Os resultados destas enquisas, expresados en gráficas como a que encabeza esta entrada, quedaron reflectidos no "Proxecto Lingüístico de Centro" e serviron de base para fixar os obxectivos do “Proxecto de Fomento de Uso do Galego” para o curso escolar 2008/09. Agora, a través da canle que nos ofrece este blog, poñemos á vosa disposición estes dous documentos que consideramos de gran interese para toda a comunidade educativa.

Benvida

2008-10-22T18:40:00.001+02:00

Queremos dar a nosa máis agarimosa benvida ao segundo blog nacido no CEIP San Martiño de Salcedo, un blog irmán da Salcedoteca, que xorde do labor do Equipo de Normalización e Dinamización Lingüística. En primeiro lugar imos a explicar o por que deste nome tan "especial": Oñitram, que é Martiño escrito ao revés, é o nome que @s nos@s alumn@s lle puxeron un bo día á fraga que está ao carón do colexio, unha fraga chea de maxia, de criaturas extraordinarias e, sobre todo, chea de historias.

O principal obxectivo deste blog é o de ir informando a toda a comunidade educativa das diferentes actividades que o centro leva a cabo en materia de normalización lingüística, así como das diferentes novas que dentro deste ámbito xurdan.

Nos diferentes apartados que o forman poderedes atopar moitos recursos interesantes, como materiais elaborados por alumn@s e mestr@s, fotografías das actividades organizadas, enlaces de interese, lexislación e campañas de fomento do uso do galego e algunhas outras cousas curiosas.

Contamos coa vosa colaboración para que este blog saia adiante!